A historia que narra esta novela é do todo inverosímil... e con todo sucedeu. É incrible, pero é verdade: un museo de primeiro nivel internacional −o Raíña Sofía− encarga para a súa inauguración en 1986 unha obra a unha estrela da escultura, o norteamericano Richard Serra. O escultor entrega unha peza creada ad hoc para a sala na que ía exhibirse. A escultura en cuestión −Equal-Parallel/Guernica-Bengasi− consta de catro bloques de aceiro independentes de grandes dimensións. Inmediatamente elévase a peza a obra mestra do minimalismo. Finalizada a mostra, o museo decide gardala e, en 1990, por falta de espazo, confíaa a unha empresa de almacenaxe de arte, que a traslada á súa nave en Arganda del Rey. Cando quince anos despois o Raíña Sofía quere recuperala, resulta que a escultura −de trinta e oito toneladas!− volatilizouse. Ninguén sabe como desapareceu, nin en que momento, nin a mans de quen. Para entón a empresa que a custodiaba xa nin sequera existe. Cero pistas sobre o seu paradoiro. A misteriosa desaparición queda elevada tamén a categoría de obra mestra. Como o escándalo adquire resonancia mundial, Serra acepta replicar a peza e darlle rango de orixinal, e o Raíña Sofía, sumala á súa exposición permanente.
Entre a novela de non ficción e a crónica novelada, entre o disparate e o alucinógeno, Obra maestra reconstrúe a ritmo de thriller trepidante un caso que leva a facer algunhas preguntas perturbadoras: como é posible que algo así sucedera? Como se converte en orixinal unha copia? Que é arte na arte contemporánea? Cal foi o verdadeiro destino da famosa, enorme e pesada escultura de aceiro convertida en aire? É posible que un día apareza?

Para responder a estas e outras preguntas, as páxinas da novela acollen unha sucesión de voces moi dispares: as da fundadora do Raíña Sofía, algúns dos seus directores, os policías da Brigada de Patrimonio que investigaron a desaparición, a xuíza que instruíu o caso, persoal do museo, ministros, o empresario que custodiou a obra, galeristas americanos, o propio Richard Serra, o seu amigo −e antigo axudante− Philip Glass, marchantes de arte, críticos, artistas, concelleiros, coleccionistas, un coreógrafo que danzou ao redor da escultura, enxeñeiros, xornalistas, historiadores, vixiantes, políticos, unha terrorista, un xubilado, un camioneiro, un chatarreiro, un taxista, unha axente da Interpol, o propio autor do libro, en tratos cunha editora para escribilo, ou César Aira, que propón unha teoría tan tola como deliciosa sobre o verdadeiro destino da escultura.

1º-2º BAC

Formación Profesional